Eftir gríðarlega velheppnaða ferð á Höfn fer Háskólalestin næst á Vopnafjörð, en hún verður þar 14. - 16. maí.
Föstudaginn 15. maí verða kennd námskeið úr Háskóla unga fólksins í Vopnafjarðarskóla í efnafræði, forritun, japönsku, vísindaheimspeki, vindorku, stjörnufræði og næringarfræði. Nemendur úr elstu bekkjum Vopnafjarðarskóla munu sækja námskeiðin, auk nemenda frá Brúarásskóla og Grunnskóla Borgarfjarðar eystri.
Laugardaginn 16. maí býður Háskólalestin til vísindaveislu í Félagsheimilinu Miklagarði. Þar verða ýmsar sýnitilraunir, ferðalög um himingeiminn í stjörnutjaldinu sívinsæla, skrýtnir og skemmtilegir speglar, efnafræðitilraunir og svona mætti lengi áfram telja. Aðgangur er ókeypis og allir eru velkomnir!