Háskólalestin heimsækir Voga

Háskólalestin leggur brátt í sína síðustu ferð í bili, en lestin verður í Vogum 26. - 27. maí. Fimmtudaginn 26. maí kl. 17:00 - 19:00 verður stjörnutjaldið sívinsæla opið gestum og gangandi í Tjarnarsal í Stóru-Vogaskóla. Þar gefst fólki tækifæri til að ferðast um himingeiminn undir leiðsögn Sævars Helga Bragasonar, sem er fyrir löngu orðinn þekktur fyrir einstaka þekkingu sína á himingeimnum. Allir eru velkomnir á sýningar í stjörnutjaldinu og er aðgangur að sjálfsögðu ókeypis.

Föstudaginn 27. maí mætir áhöfn Háskólalestarinnar í Stóru-Vogaskóla. Þar verða haldin valin námskeið úr Háskóla unga fólksins fyrir nemendur eldri bekkja. Námskeiðin sem verða í boði á föstudag eru efnafræði, eðlisfræði, stjörnufræði, Biophilia-tónvísindasmiðjur, leikur með hljóð, vísindaheimspeki, vindmyllusmíði og japanska.

Þetta er fyrsta ferð Háskólalestarinnar í Voga, en lestin hefur heimsótt hátt í 30 staði síðan hún lagði í sitt fyrsta ferðalag árið 2011.

Hægt er að fylgjast nánar með ferðalögum lestarinnar á heimasíðu hennar og einnig á Facebook.

Þú ert að nota: brimir.rhi.hi.is