Von á vísindaveislu á Húsavík

Háskólalestin heimsækir Húsavík föstudaginn 27. og laugardaginn 28. maí með sannkallaða vísindaveislu: fjör, fræði og viðburði.

Föstudaginn 27. maí sækja nemendur 6. – 9. bekkjar Borgarhólsskóla valin námskeið úr hinum vinsæla Háskóla unga fólksins og kynnast þar stjörnufræði, japönsku, latínu, fornaldarsögu,  sjúkraþjálfun, eðlisfræði, jarðvísindum og vistfræði.

Laugardaginn 28. maí kl 13–17 býðst gestum og gangandi á öllum aldri að taka þátt í dagskrá Háskólalestarinnar á Húsavík sem fer fram á Hvalasafninu og í Salnum í Borgarhólsskóla.

Í boði verður  m.a. sýning félaga úr Sprengjugenginu landsfræga, stjörnutjald, eldorgel, kröftugar sýnitilraunir, japönsk menning, furðuspeglar, snúningshjól, tæki og tól sjúkraþjálfara og stjörnuskoðun, svo eitthvað sé nefnt.

Í fyrirlestrasal Hvalasafns verða stutt fræðsluerindi. Þar flytur Bryndís Brandsdóttir erindi um jarðskjálfta í Kelduhverfi og tengsl við eldstöðvar Þeistareykja og Kröflu og Sævar Helgi Bragason fræðir gesti um leyndardóma himingeimsins og raunveruleika geimfaranna. Marianne Rasmussen fjallar um tungumál hvala, Sigursteinn Másson flytur erindi um viðhorfsbreytingar til hvalveiða og verndar og Rögnvaldur Ólafsson veltir upp spurningum um tengsl ferðamennsku og náttúru.  

„Vísindasigling“ á laugardagsmorgni  
Norðursigling býður heimamönnum á Húsavík í sannkallaða vísindasiglingu þar sem Marianne H. Rasmussen, forstöðumaður Rannsóknaseturs HÍ á Húsavík, veitir innsýn í heillandi hljóðheim hvalanna. Þetta er einstakt tækifæri fyrir heimamenn að kynnast hvalarannsóknum á svæðinu. Farið verður í siglinguna kl. 9:00 á laugardagsmorgninum.

Dagskrá Háskólalestar er öllum opin, aðgangur ókeypis og allir hjartanlega velkomnir.

Þú ert að nota: brimir.rhi.hi.is