Háskólalestin yljaði

Skagstrendingar og nærsveitamenn létu ekki kuldakastið um síðustu helgi hafa áhrif á sig og tóku vel á móti Háskólalestinni þegar hún staldraði þar við í tvo daga.

Föstudaginn 20. maí sóttu nemendur í efri bekkjum Höfðaskóla á Skagaströnd og Grunnskóla Blönduóss valin námskeið úr hinum vinsæla Háskóla unga fólksins, þar á meðal námskeið í stjörnufræði, latínu, japönsku, nýsköpunar- og frumkvöðlafræðum og eðlisfræði. Óhætt er að segja að áhuginn hafi skinið úr andlitum nemenda eins og myndirnar hér til hliðar bera vitni um.

Síðari daginn, laugardaginn 21. maí, bauðst gestum og gangandi á öllum aldri að taka þátt í Vísindaveislu Háskólalestarinnar. Í félagsheimilinu Fellsborg sýndu félagar úr hinu víðfræga Sprengjugengi listir sínar, eldorgelið og teiknirólan voru á sínum stað og hægt var að kynna sér japanska menningu og fornleifafræði svo eitthvað sé nefnt. Enn fremur gátu gestir skoðað stjörnurnar í stjörnutjaldinu sem komið hafði verið upp í Íþróttahúsi Höfðaskóla.

Þá var boðið upp á stutt fræðsluerindi í kaffihúsinu Bjarmanesi. Sævar Helgi Bragason fræddi gesti um leyndardóma stjörnufræðinnar, Soffía Auður Birgisdóttir flutti erindið „Endurvinnsla bókmenntaarfsins“ og Albína Hulda Pálsdóttir greindi frá leyndardómum fornleifafræðinnar, svo dæmi sé tekið.

Skagaströnd var fjórði viðkomustaður Háskólalestarinnar á ferð hennar um landið í sumar. Ferðin er liður í hátíðahöldum Háskóla Íslands vegna aldarafmælis skólans. Næst stöðvast lestin á Húsavík 27. og 28. maí. Þar verður meðal annars verður boðið upp á hvalaskoðunarferðir í fylgd vísindamanna úr bæjarfélaginu laugardaginn 28. maí kl. 9 og kl. 21.

Þú ert að nota: brimir.rhi.hi.is