Háskólalestin í Fjarðabyggð

Háskólalestin brunaði um Fjarðabyggð um liðna helgi og bauð bæði upp á vísindaveislu fyrir alla fjölskylduna og háskólanám í völdum greinum í grunnskólanum á Neskaupstað. Gríðarlega hressir og fróðleiksfúsir krakkar úr elstu bekkjum grunnskólanna í Neskaupstað, á Stöðvarfirði, Reyðarfirði, Fáskrúðsfirði og Eskifirði fengu að kynnast næringarfræði, blaða- og fréttamennsku, japönsku, efnafræði, jarðfræði, stjörnufræði, tómstunda- og félagsmálafræði auk kynjafræði. 

Fjarðabyggð var þriðji og síðasti áfangastaður Háskólalestarinnar þetta vorið. Eins og á öðrum stöðum færði lestin mikið fjör inn í bæjarlífið og blandaði saman við gagnleg fræði fyrir alla aldurshópa. Vísindaveislan á laugardeginum var líklega sú fjölmennasta sem Háskóli Íslands hefur staðið að. Sól skein í heiði í austfirsku logni eins og það gerist mest á Reyðarfirði. Í sömu andrá og dyr Háskólalestarinnar voru opnaðar upp á gátt varð húsfyllir og alveg troðið á sýningum Sprengjugengisins. Í grunnskólanum var boðið upp á sýnitilraunir, furðuspegla og syngjandi skál, japanskt mál og menningu, unga fréttamenn að störfum, mælingar og pælingar og undur himins og jarðar voru kynnt á hvunndagsmáli. Stjörnutjaldið naut gríðarlegrar hylli og þurfti tvær aukasýningar til að anna eftirspurn en tjaldað var í félagsheimilinu á Reyðarfirði.

Á undan vísindaveislunni var liðsmönnum Háskólalestar boðið að skoða Helgustaðnámuna heimsfrægu í Fjarðabyggð sem geymir gersemar á alíslenska vísu. Þangað var áður fyrr sótt silfurberg sem meðal annars prýðir hvelfinguna í anddyri Aðalbyggingar Háskóla Íslands. Á Vísindavefnum, sem m.a. tók þátt í Háskólalestinni, segir þetta um silfurbergið: „Silfurberg hefur gegnt fjölbreyttu og oft ómissandi hlutverki í merkum vísindauppgötvunum, sem sumar hverjar urðu tilefni Nóbelsverðlauna. Þær flýttu fyrir framþróun ýmissa sviða raunvísinda á 19. öld og fram eftir þeirri 20., til dæmis í rafsegulfræði, lífrænni efnafræði, kristalla- og steindafræði, og svonefndri nútímaeðlisfræði sem byggir meðal annars á kenningum Einsteins. Lengi vel fannst silfurberg óvíða nema á Íslandi. Var mikið magn þess flutt utan frá Helgustöðum til nota í mælitækjum og tilraunum; skipuleg námuvinnsla fór fram þar með hléum á árabilinu 1850-1925, og einnig við Hoffell í Hornafirði um hríð frá 1911.“

Helgustaðanáma var friðuð sem náttúruvætti árið 1975.

Myndir frá heimsókn Háskólalestarinnar til Fjarðabyggðar má sjá á ljósmyndagalleríi vefs Háskóla Íslands.

Þú ert að nota: brimir.rhi.hi.is