Fjör og fræði í Háskólalestinni 2024
Háskólalestin landsþekkta brunar á tvo staði þetta vorið. Hún verður á Höfn í Hornafirði 3. maí og á Húsavík 22. maí. Í lestinni er fléttað saman dúndrandi fræðum og vísindafjöri.
Á báðum stöðum verður Háskólalest HÍ með kennslu í grunnskólanum og kynningu á undrum vísindanna fyrir grunnskólakrakka og heimafólk.
Áhöfn lestarinnar býður upp á mjög fjölbreytt og spennandi námskeið og smiðjur af öllum fræðasviðum fyrir grunnskólanemendur og líka fyrir kennara. Í áhöfn lestarinnar er fræðafólk og framhaldsnemar við Háskóla Íslands sem öll hafa mikla reynslu af miðlun og kennslu. Einnig verður vísindafólk frá Rannsóknasetrum HÍ í lestinni.
Markmiðið með Háskólalestinni er að kynna kynna vísindi á lifandi hátt og styðja við starf grunnskólanna samtímis því að efla tengsl HÍ við landsbyggðina.
Háskólalestin fékk Vísindamiðlunarverðlaun Rannís árið 2012.
Kynntu þér undur vísindanna á opnu húsi
Háskólalestin býður öllum á opið hús á Höfn og Húsavík til að sjá afrakstur krakkanna úr lestinni fyrr um daginn auk þessa að gefa fólki færi á að kynnast vísindafólkinu betur og sjá undrin með eigin augum.
Á opna húsinu er hægt að spjalla við fræðafólkið um allt milli himins og jarðar, eða því sem næst.
Nánari upplýsingar
Það er alveg ókeypis á opna húsið og öll eru hjartanlega velkomin!
Hafið endilega samband ef nánari upplýsinga er óskað með því að senda póst á netfang Háskólalestarinnar
Hægt er að hafa samband fyrir nánari upplýsingar á netfang Háskólalestarinnar haskolalestin@hi.is og á Facebook Háskólalestarinnar.
